【阅读美文·分享心情·感悟人生·www.mwenting.com】
当前位置 : > 心情日记 > 快乐日记 > 正文

好似只雀咁靓

作者:admin
来源:未知 时间:2021-10-25 12:49 阅读:0次   我要投稿   作品点评

   街坊都话,对兰姨,简直系佩服到五体投地。六十几岁人,仲对衣着咁讲究,着住碎花旗袍出街,着住平底布鞋。一头短发,虽然花白,但系梳到一丝不苟。睇上去,成个民国时期啲大家闺秀噉样,既端庄贤淑,大方得体,又干净利落,清清爽爽。

 
 
 
    兰姨推住轮椅,行公园。佢老公对比之前瘫坐个样,已经明显坐直咗好多嘞。对手攞住两个钢丝球训练用力抓。好多人碰见佢哋,都主动打招呼。有人仲撩阿叔讲嘢:“志叔,你好有福气啊,你老婆好似十八岁咁试正!”阿叔咧开嘴乐呵呵应道:“系~啊,靓~过~鬼火!”虽然震下震下,慢吞吞,有啲吐字不清,但系旁人都听得清楚佢讲乜嘢。
 
 
 
 
 
 
 
    原来,你有所不知嘞。兰姨以前着装都系比较随便是但,干净企理就得,冇咁光彩照人嘎。自从前年阿叔中风之后,兰姨一时间唔知点算至好。不过,佢好快冷静落嚟,照顾个老公住院养病无微不至,出院之后,就一日三餐茶来水到,服侍阿叔大小二便、擦身洗面。
 
 
 
    当佢发觉佢老公有啲“病坏品”,自暴自弃,悲观厌世。兰姨一啲都冇放弃对佢嘅鼓励,同以前一样,坚持早晚两公婆出去散步,出双入对。只不过,以前系拖手仔行公园,而家系一个坐轮椅,一个推住啫。
 
 
 
 
 
 
 
    兰姨为人乐观豁达,佢话:面对困难,唯有惗办法克服,否则就会被困难征服。做人嘅嘢,跌倒就要企翻起身,再苦再难,都要向前望。唔系噉样,可以点呢?佢立定心水要鼓励阿叔振作起来,所以,常日打开收音机,放啲正能量励志嘅讲话畀阿叔听,帮阿叔打气,鼓舞佢自己康复训练嘅斗志。
 
 
 
    兰姨专登将自己后生嗰阵时啲靓衫攞出来着。啱唔啱身?冇肥冇瘦,啱啱好!按兰姨嘅讲法就系:而家啲后生仔就钟意着衫黑焖焖、乌卒卒,扮成熟、老成持重,啲老人家呢,就兴着到红红绿绿、鲜鲜艳艳、红红火火,装嫩、扮后生。佢就几歹都要提醒自己同佢老公,自己仲好后生!几时都系咁有活力嘅!而家出门,一系就“名媛款”,一系就T恤牛子裤。人哋调侃话:追潮流啊?赶时髦啊?博出位啊?想成为网红咩?兰姨嘻嘻哈哈全部回应话:系嘎,老来俏啰,整色整水嘛,临老发姣啊嘛,系咪好似鬼火咁靓呢?系咪好似只雀咁靓呢?哗哗哗,系咪好夸张呢?通常啲街坊就会话:边系呢,不知几好睇啊,后生咗成十年!有人仲氹佢话:直情好似香港小姐喔,美貌与智慧并重,要样有样,要身材有身材!
 
 
 
 
 
 
 
    兰姨话:佢就要努力保持最好状态,先至有气有力照顾佢老公嘎嘛。佢要全力做到最好,影响佢老公,燃点生活嘅热情。病人嘅生存意志同心态好紧要,乐观绝对有助于身体康复。而家,佢老公都有转变嘞,每日精神奕奕,唔再系死气沉沉。兰姨坚持帮老公做按摩,仲训练志叔讲嘢、唱歌,训练志叔慢慢企起身、慢慢行路添,每天进步一点点,非常之难得。志叔好积极啊,应承兰姨以后行得走得,要同兰姨一齐跳华尔兹,做一对好搭档添。
 
 
 
    听着佢两老嘅爱情故事,真系令人感动同鼓舞。系嘅,任何人都会有困难,但系,坚强面对,勇敢面对,要对生活有所追求,精神上有所寄托,有情趣,有目标,噉就会越来越好嘎。

阅读感言

所有关于好似只雀咁靓的感言